« Makempet a osayan ko lalag | Home | Ipeleka ko masa (Sample 2) »

Ipeleka ko masa (Sample 1)

By admin | April 30, 2008

Assalamo alaikom warahmatullahi wabarakatoho. Aya ko bialoy a pasodan a onayan o ka khapayag go lalag ko angkanan a kalima o salam ka gianan ni bolawan a katharo a pamemegayan no agama Islam a witwitian so kalilintad nago so kapipiya ginawa, na pamemegayan niyan so rahmat ago so kabarakat ka kagiya gianan so kalima a kiya sabapan sa ini pangotara o agama Islam sa inged da donya–a gianan so agama tano a miya tindo-tindos ko langowan no agama sa donya.

Na sabap ko panamar a sarta a panagontaman sa kisampay onggagaisa ko singanin niyan sa kapaka iibarat ta masa a ikalilimod diyo a langowan a Muslim a mga dato ago mga bai sa masa imanto wa alongan sa torogan na pagadilan a dii kambilangatawan, ka aden mamangisayat so mirerendingon, ka aden mabinentay so madadalemon a kamoliyaan, ka aden kanggonai o miaka masaon so kiya ilaya aniyan ko panagontaman no dii embilangatao ko masa a makatatangan ko kambaya-baya tabi ako ko Allaho Taallah.

Na so pada-adat nago so panabiya aken rekano a langowan na miaka masa sangkai a kalilimod na sabap ko maisa-isa tano ko bangsa maporo, nago maisa-isa tano ko ingaran tano, nago maisa-isa tano pen ko agama Islam, na sabap ko diko ka khaganda walii sa lalag ga Sultan naya sa Ramain sa kini pandoon niyan rakenon a moriatao niyan sa so simalao a mababantak ko singanin o khakadiat sa mapiya sa kisampay o antapian ko masa sa katokawi ko sabap pa da niyan mindarainon na sabap ko limo o Allah, na baanda aya misowat taken rekano na pakaibaraten tano sa torogan angkai a masa sa giyai den ni kiya lekai aken rekano ko mga panirowanga iyan kaan niyo minggolalan so mapagaantangan niyo a ikapiya angkai a kalilimod sa rendanan niyo den so kaya a onota o mamala sa somambi so katerang sa makamoayan so okit ko panagontaman ko kambilangatao sa mikedeg ko lalan a ontol o kapagongangen aya kasosoat to kadenan tano a so Allah.

WASSALAM.

———————————
Source: Paninggalan sa Ranao (Osayan ko pizosonan na katharo, darangen, pananaroon, bayok, sii ko pimbarambarang a masa a mga kalilimod sa inged da Ranao.) Phoon sa pamikiran ni Tingcap G. Pandi. Ini sorat ti Jamel S. Macarampat

Topics: Kapamlalag |

Comments

You must be logged in to post a comment.